За два дена 56 семејства аплицирале за субвенции за клима уред

Во првите два дена 56 граѓани аплицирале за надоместок на дел од трошоците за набавка на клима уреди, информираат од Општина Куманово.

„Има интерес, во понеделник и вчера добивме 56 пријави од заинтересирани граѓани. Повикот е отворен до исцрпување на средствата, впечаток е дека за кратко време ќе се исполни квотата“, објасни Момчило Јовановски од Сектор за комунални работи.

На повикот можат да аплицираат граѓаните кои имаат купено високоефикасен, инвертер клима уред за затоплување од 1 јануари годинава, па се до завршување на повикот. Граѓаните кои ќе аплицираат треба да се жители на општината, досега да немаат користено субвенции или право на поврат на средства за набавка на клими или печки на пелети, без разлика од кој извор, ниту, пак, субвенции за приклучок на гас. Еден од условите е за загревање на домовите да користат печки на јаглен, дрва, нафта или мазут. Уредот за кој се бара субвенција да е целосно исплатен, намонтиран и во употреба во домот на лицето кое аплицира.

Субвенициите ќе се распределуваат по системот „прв дојден, прв услужен“.

Од 10 понеделник започна повикот на Општина Куманово со кој едно семејство може да добие 20 илјади денари за набавка на енергетски ефикасен клима уред, мерка со која се прави обид за намалување на аерозагадувањето во градот во текот на зимата. За ова мерка се издвоени 2 милиони денари, што значи дека 100 семејства имаат можност да ја искористат.