Затворени маркети, фирми за увоз и аптека поради зголемени маржи

Три маркети, една аптека и три најголеми увозници на овошје и зеленчук се затворени на 15 дена поради непочитување на владината одлука за ограничување на маржите, соопшти Државниот пазарен инспекторат.

 

Според директорот на Инспекторатот, Влатко Стојкоски, кај затворените правни субјекти биле утврдени маржи кои достигнувале и до 70 проценти, што значително ја надминува законски дозволената граница.

„Освен привременото затворање, овие компании ќе се соочат и со парични казни. Дополнително, активно се работи на уште 30 предмети кои ги опфаќаат речиси сите големи маркети во земјата. Инспекторите се постојано на терен и контролите продолжуваат без прекин“, изјави Стојкоски.

Во периодот од 24 февруари до 6 март, Државниот пазарен инспекторат спровел 365 надзори во малопродажбата и 64 во големопродажбата, со што биле опфатени повеќе од илјада продажни места. Притоа биле констатирани 36 неправилности, а издадени се прекршочни платни налози во вкупен износ од 42.000 евра.

Инспекторатот најавува засилени контроли со цел спречување на прекумерното зголемување на цените и заштита на потрошувачите.