Социјалните мрежи и мобилните телефони се основните причини за булинг, сметаат учениците

На прашањето „Кои се основните причини за појава на врсничко насилство“ дури 81 посто од анкетираните ученици одговориле дека тоа се социјалните мрежи и мобилните телефони, покажува „Студија за кохезиво и инклузивно општество (холистички пристап)“ која денеска беше презентирана во Куманово.

 Резултатите ги презентираше Нелко Нелковски, претседател на Здружението „Театар Боеми“ кои го спроведоа овој проект.

„Проектот траеше една година, и во текот на целата година траеше истражувањето и прибирањето податоци, кои потоа ги сублимиравме и ја издадовме студијата минатиот месец. Сите три општини се третираа како еден примерок, генерално состојбата не е сјајна, но од аспект на ангажман на општината и училиштата не може да се каже дека е лоша. Училиштата даваат се од себе, но има одредени специфики кои е потребно да се надминат за да системот се подобри и биде на ниво на европски организиран систем. Се уште не сме на тоа ниво, сите го знаеме тоа„, истакна авторот на студија д-р Нелко Нелковски.

Истражувањето е вршено во општините Куманово, Гази Баба и Кисела Вода, со ученици од 8 и 9 оддление од основните училишта, и прва и втора година од средните училишта, како и нивните родители.

Александар Јовановиќ, раководител на Секторот за образование потенцираше дека врсничкото насилство е процес кој трае со години и треба да се третира подолготрајно. Тој призна дека е тангиран и од податокот дека 81 отсто од испитаниците сметаат дека социјалните мрежи и мобилните телефони се основните причини за појава на булинг.

Затоа досега во три училишта пробно е воведена иницијативата без мобилни на училиште. Пионери во ова се „Христијан Карпош“ и „Браќа Миладиновци“ од Куманово, а училиштетот „Вера Которка“ од село Клечовце веќе две години не дозволува мобилни телефони во училиштата.

Од анкетираните ученици 65 проценти потврдиле дека биле сведоци на било каква форма на физичко насилство, а дури 71 посто забележале вербална злоупотреба меѓу врсниците. Голем број од тинејџерите, 66% сметаат дека врсничкото насилство е значајно прашање за училиштето, а дека притисокоците од врсниците придонесуваат со 49 отсто за појава на булинг. Како причини се наведуваат и семејни, социјални, економски проблеми, но тие се наоѓаат под границата од 50 проценти- на овие прашања поголем дел одговориле со „не знам“. Загрижува фактот што 71 посто од анкетираните не знаат дали за појавата е одговорен фактот што најчесто насилниците се несвесни за последиците. Дури 77 проценти од учениците од основните и средните училишта одговориле дека не побарале помош или поддршка дури и кога забележале случај на врсничко насилство.

Предложени се бројни мерки за спречување на булингот и промовирање на безбедна училишна средина- почести активности во соработка со родителите, освен со оние што вршат насилство, построги дисциплински мерки, казнување на насилниците и нивните родители, обезбедување низ училиштата, темата да е почесто присутна во училиштата и многу други.

Се апелира да се пријавуваат сите случаи на врсничко насилство, но и да се применува правилникот за вакви состојби. Најдобро е конфликтот да се реши во самото училиште, доколку излезе во пошироки рамки реагираат полицијата и Центарот за социјални работи (ЦСР).

На состанокот присуствуваа претставници од општинската администрација, директори и дел од стручните служби на општинските основни училишта.