Во чест на Борјанчо Мицевски, во Крива Паланка се одржа Меморијален турнир во футсал

Победи екипата на СД-ФАС Кратово, втори беа  ФК Борец Јуниор Велед и трети Буќоше градба.

Во паузата пред финалниот натпревар беше врачена плакета на семејството на Борјанчо Мицевски како знак на почит и благодарност за неговиот придонес - како градоначалник се залагаше за примена на Законот за младинско учество и младински политики и остави трајно наследство преку поддршката на младите и отворањето на Europe House во Крива Паланка.

„Горд сум што како член на Локалниот младински совет и еден од организаторите успеавме да го реализираме првиот Меморијален турнир во чест на Борјанчо. Овој настан не е само спортско натпреварување, туку симбол на заедништво и сеќавање. Спортот не зближува и не потсетува на вистинските вредности – другарството, почитта и единството,“ изјави Никола Митовски, член на Локалниот младински совет и еден од организаторите.

Организаторите најавија дека меморијалниот турнир ќе прерасне во традиција со која секоја година ќе се негува сеќавањето на Борјанчо Мицевски и ќе се промовира спортскиот дух во заедницата.

Турнирот беше реализиран со поддршка од Општина Крива Паланка.