25. 06. 2020 22:19

Манипулативен наслов со сензационалистички тврдења

Манипулативен наслов со сензационалистички тврдења

Пишува: Убавка Јаневска

Текстот со манипулативен наслов „Црни вреќи со банкноти од 500 евра се појавија пред штабови на СДСМ низ градовите во Источна Македонија“ објавен на 23 јуни 2020 година на веб порталот www.bregalnicki.mk е класична дезинформација  напишана врз основа на пристрасност што претставува  спин со цел да ја оцрни партијата на власт и нејзиниот лидер Зоран Заев.

Неименуван автор сензационалистички тврди  дека парите во црните вреќи се подарок од Заев наменети за општинските организации на СДСМ во источниот дел на државата. Од приложените фотографии во текстот, кои пристигнале во редакцијата, се гледа дека на вреќите се залепени лажни банкноти  во апоени од 100 и 500 евра, испринтани на хартија, кои наводно биле забележани од случајни минувачи што ги коментирале како пари од случајот „Рекет“.

Порталот преку овој текст врши тендециозно неведување на граѓаните без да понуди факти и конкретни извори. И додека во насловот, лидот и првиот дел на текстот се наѕира сензационалистичка вест за која што читателот, особено со објавените фотографии, ќе биде наведен дека станува збор за пари што ќе се употребат за масовен поткуп, алудирајќи на предвремените парламентарни избори, веќе во вториот дел од текстот непотпишаниот автор сам себеси се демантира со откривање на факт дека можеби станува збор за герила акција.

Од ова се гледа дека тој што го пишувал текстот не истражил дали има пари во црните вреќи, кој ги оставил пред општинските организации на СДСМ во Пробиштип, Кратово и Кочани, но ставил фотографија на која Зоран Заев преку флаер на кој е отпечатен текст ПРАВДОУБИЕЦ  мафија која си има своја држава.

Текстот е крајно тенденциозен, пропагандистички и како лажна вест има за цел да и наштети на оваа политичка п како и да ги дезинформира граѓаните.

Фотографиите и особено констатацијата во завршната реченица на текстот: „Ваквите сцени со црни најлонски вреќи со пари се својствени за златната ера на ганстерите ширум светот, а според пораката на овие фотографии, златната ера на криминалот е дојдена и во Македонија“ се тенденциозни.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED - National Endowment for Democracy). Содржината на рецензијата е одговорност на авторот и не ги одразува ставовите на Метаморфозис и National Endowment for Democracy или нивните партнери.