Зачленете се во нашиот клуб на читатели и најновите текстови ќе ги добивате на вашата мејл адреса
Актуелниот светски шампион Јохан Блејк успеа да го совлада најбрзиот човек на светот Усаин Болт на трката на 100 метри на олимписките квалификации на Јамајка, најавувајќи жестока пресметка за тронот во Лондон.
Блејк постигна време од 9,75 секунди, со што за 11 стотинки постигна подобро време од светскиот рекордер Болт, додека трет низ целта помина поранешниот рекордер Асафа Пауел (9,88). Сите тројца обезбедија виза за настап на Олимпијадата, а Блејк со своето постигнување стана четвртиот најбрз човек во историјата, зад Болт (9,58), Тајсон Геј (9,69) и Пауел (9,72).
Не чувствувам никаков притисок, се е во ред. Пресреќен сум што станав државен првак на Јамајка и како таков што ќе настапам во Лондон – изјави Блејк по рушењето на личниот рекорд од 9,82.
Ова беше прв дуел меѓу двајцата јамајкански атлетичари откако Блејк ја освои светската титула во Даегу минатата година по дисквалификацијата на Болт поради погрешен старт. За Болт ова е прв пораз на патеките по 6. август 2010, кога во Стокхолм загуби од Тајсон Геј.
Болт во Лондон ќе ги брани трите златни медали освоени пред четири години во Пекинг, на 100 и на 200 метри, и на штафетата 4х100 метри.
Зачленете се во нашиот клуб на читатели и најновите текстови ќе ги добивате на вашата мејл адреса
