Пинк Пантери ја посетија Барселона

Во првиот натпревар Олимписката сала во Барселона со екипата на Хувентуд - генерација 2000 година и помали, кумановци загубија со  64-57. Потоа во сабота следуваше натпревар со Л –Хоспиталет, каде Пинк Пантери извојуваа победа, со резултат 71-64. Последниот натпревар се одигра во неделата против екипата на Барселона - генерација 2001, во тренинг центарот на Барселона која победи со резултат 80-66. Генерацијата 2001 и помали на Барселона важи за една од подобрите во Европа и е селектирана од најталентирани деца од цела Европа.

Кошаркарите на Пинк Пантери покрај одиграните натпревари имаа можност да го видат целиот комплекс од тренинг центарот на Барселона - еден од најскапите и најмодерните тренинг центри во светот, каде тренираат кошаркарите, фудбалерите и ракометарите на Барселона. Покрај културните знаменитости на Барселона, екипата имала можност да ги проследи натпреварите на фудбалскиот и ракометниот тим на Барселона.

За нас како клуб е вистинкса чест и привилегија што имавме можност да одиграме натпревари против Европските гиганти како Барселона и Хувентуд. Со прикажаните игри на трите натпревари на достоен начин ја презентиравме  Македонската кошарка во Шпанија - изјави Бојан Златковски директор на КК Пинк Пантери.

Првите контакти на КК Пинк Пантери и саработка со Барселона се случија пред една година кога директорот на младински погон на Барселона Жорди Ардевол беше гостин во Македонија, каде во договор со позната менаџерска агенција од Шпанија беше договорено тој да погледа некои играчи од Македонија.

По гостувањето во Барселона, Пинк Пантери продолжуваат да патуваат и да играат натпревари со клубови од  Европската сцена. Следна дестинација на Пинк Пантери е Москва, Русија каде кошаркарите ќе бидат во можност да одиграат неколку натпревари со ЦСКA Москва, еден од најдобрите европски клубови.