Ансамбли од Мексико, Полска, Србија, Бугарија... гости на Mеѓународниот фолклорен фестивал во Куманово

Фестивалот ќе има три вечери, а ќе настапат вкупно 10 ансамбли од земјава и странство.  Пред кумановската публика ќе се претстават гости од: Мексико, Полска, Србија и Бугарија, како и ансамбли од Скопје, Кратово и Куманово.

„Оваа година имаме квалитетен избор на гости, кои ќе понудат разноврсна програма за сите вкусови и за сите генерации. Затоа ги повикувам сите граѓани кои го сакаат фолклорот да одвојат време и да побегнат од секојдневните обврски, да дојдат и да уживаат во богатата програма“, изјави Мирoслав Крстевски, претседател на организацискиот одбор на фестивалот.

Фестивалот ќе започне во вторник во 18 часот со дефиле низ градските улици, а свеченото отворање е во 19.30 часот на платото пред Центарот за култура во Куманово. 

Фестивалот ќе отворат домаќините, играорците од КУД „Панче Пешев“ од Куманово, а потоа следуваат настапите на: Ансамбл „Словјанки“ од Краков, Полска, Студио „Блажевски“ од Скопје, Ансамбл „Варна“ од Бугарија,  КУД „Иво Лола Рибар“, Белград, Србија и првата вечер ќе ја затвори Фолклорниот ансамбл „Алијанса“ од Мексико.

Во среда на 20 јули, екслкузивен настап ќе имаат учесниците: КУД „Бајрам Шабани“ од Куманово, Ансамбл „Варна“, Фолклорно студио „Етнос“ од Скопје, Ансамбл „Словјанки“,  Фолклорниот ансамбл „Алијанса“ и  КУД „Иво Лола Рибар“.

Фестивалот ќе го затворат КУД „Гоце Марковски“ од Долно Лисиче, КУД „Ефрем Каранов“ од Кратово,  Фолклорниот ансамбл „Алијанса“, КУД „Иво Лола Рибар“ ,  Ансамблот „Словјанки“ и Ансамбл „Варна“.

Концертите почнуваат во 19.30 часот.

Фестивалот трета година по ред го организира КУД „Панче Пешев“ и МКЦ „Козјак“ од Куманово, со поддршка на Општина Куманово и Министерството за култура. На фестивалот е најавено присуството на министерката за култура, а поканети се и премиерот, претседателот, министри, пратеници и амбасадори на земјите учесници.