Божиќен базар за најмалите организираше хуманитарното здружение „Дарио Петровски“

Ова е втора работилница на која присуствуваа повеќе од 40 деца. Од организацијата велат дека намерата им била да се развеселат дечињата и штитениците од „Порака наша“, да се анимираат и да го почувствуваат празничниот дух.

Поводот е да ги израдуваме децата пред Божиќ, да не се дома, сега е и распуст. Да излезат од дома, да се поиграат, анимираат, забавуваат и дружат. На работилницата цртаме, боиме, пееме и се забавуваме. Смисливме интересни игри и забава, но ќе настапат со танцова точка и групите Виртус и Фјужн, истакна организаторката Вања Роберт.

За божиќната забава дечињата украсуваа колачиња, правеа новогодишни украси од картон, најмалите боеја со дрвени боички, а сите заедно убаво се забавуваа.

Центарот за култура го обезбедил просторот, а сите материјали се обезбедени од сопствени средства на хуманитарната организација.

ХО „Дарио Петровски“ пред новогодишните празници подели околу 600 пакетчиња, и тоа во училиштата за деца од ранливи категории на граѓани во селата Табановце, Четирце, Горно Којанре, Орашац, Кучкарево, Габреш, Доброшане, Биљановце и на Детскиот оддел на Општа болница Куманово. Со акциите не се ограничени само локално, па имале донации и на детска хирургија на Клиничкиот центар „ Мајка Тереза“ во Скопје, а на Одделот за онкологија донирале новогодишна елка и лампиони.Ги посетиле штитениците од Домот за деца без родители и родителска грижа „11 Октомври“ во Скопје.