Денот на независноста одбележан на Спомен костурница

Пред споменикот цвеќе положија борците, делегација од Советот на општина Куманово, политички партии, здруженија, претставници од училишта и други. Пред присутните се обрати претседателот на Советот на општина Куманово, Максим Димитриевски кој кажа дека во Спомен костурницата се коските на борците кои животот го дале за оваа држава, и сè она што ние денес се потешко го сочувуваме.

Денеска се трудиме во континуитет да ја градиме слободна и независна Република Македонија. Тоа е наша одговорност и обврска. Ја превземаме таа должност и имаме обврска кон сите овие на кои што денеска им укажавме чест да продолжиме во тие заложби. Куманово се вложи во самобитноста на Република Македонија. Затоа не можам, а да не споменам дека настаните кои што низ историјата на овој град се забележани како позитивни настани, се составен дел на историјата на нашата држава, се длабоко втемелени во нејзината независност и самобитност. Ние имаме обврска да продолжиме таму каде што застанаа нашите предци - изјави Димитриевски.

Тој рече дека сите граѓани без разлика на која партија и припаѓаат треба да ја градат државата, во спротивно идните генерации ќе им судат, а моралниот суд е најголем.

На прославата ученици читаа литературни творби посветени на Македонија и беа прочитани историските факти за 8 - ми септември. Македонија денеска навршува 24 години од независноста,  откако на 8 септември  1991 година нејзините граѓани со огромно мнозинство гласаа на референдумот изјаснувајќи се за самостојна и суверена држава.