Дваесет и пет кила марихуана запленети на Табановце

Во автомобил “цитроен ц 3“ управуван од албански државјанин С.Г., во предната десна врата под тапацирот е најдено пакување со зеленкаста материја со специфичен мирис. По извршена контрола во сите четири врати во фабричките шуплини и во бункери на предниот и задниот браник се најдени 30 пакувања марихуана тешки 23 килограми. Во западно европските земји вредноста на дрогата би достигнала до 40.000 евра.

Во предистражната постапка е утврдено дека за сума од 3000 евра С.Г. се обидел да пренесе 5 килограми марихуана во Милано, Италија. Бидејќи бил во тешка материјална состојба го прифатил предлогот и на критичниот ден го земал автомобилот по што со мајка му и вереницата од Скадар преку Косово тргнал за Италија.

Во вториот случај во автобус кој сообраќал на релација Струга - Берн во личниот багаж се најдени 2 килограми марихуана кои биле ставени во кеси од чајни колачи. Колачите биле внимателно извадени и внатре во оригиналната амбалажа била ставена дрогата. На прашање на цариниците чија е дрогата никој од патниците не одговорил потврдно.

Утврдено е дека С.А.(26) од с.Студеничани ја купил дрогата десет дена однапред и сакал да ја прошверцува во Австрија. Тој се договорил со Ф.А.(17) и И.А.(23) од истото село да му ја донесат дрогата на меѓуградската автобуска станица во Скопје и тој да ја однесе за Австрија. С.А. е уапсен, а другите две момчиња се во бегство.

И во двата случаи царината против сторителите поднесе кривични пријави за неовластено производство и пуштање во промет на наркотични дроги, прихотропни супстанци и прекурсори.