Еколошка акција во „Панче Пешев“ како подготовка за „Графити фест“

Акцијата ја организира од фестивалот на улична уметност „Форма“ од Куманово, членови на месната заедница „Панче Пешев“, а сметот го чистеа осудени лица од Затвор К’шање. Акцијата ќе трае цела недела.

„Ги замолуваме соседите и вработените во околните објекти да ги отстраната своите автомобили, и да не паркираат во наредните неколку денови за да го завршиме планираното – косење на трева, собирање отпадоци, санација и подготовка на ѕидот на гаражите. Во сабота овој крак ќе биде затворен за сообраќај, тука ќе бидат поставени штандови, барови, тезги, а секако потребен е слободен простор и за уметниците“, истакна Бобан Кипријановски, член на МЗ „Панче Пешев“ и учесник во акцијата.

За деновите од викендот, 18 и 19 мај е закажано шестото издание на „Графити фест“, во организација на Здружението за ликовна уметност „Форма“ од Куманово. Замислен е како дружење на публиката со уметниците кои создаваат улични цртежи, графити и мурали.

„Графити фест“ е единствена манифестација во Македонија, која неколку години наназад  дава нов лик на урбаниот простор во Куманово и ги оплеменува запуштените места,  отсликувајќи ја  душата на  уличната уметност и креативноста на младите. Во Куманово нивните мурали красат повеќе станбени блокови, училишта и јавни објекти.