Фросина Лазаревска нов координатор на регионалното ЗНМ

Кумановските новинари едногласно и дадоа поддршка на Лазаревска, и сметаат дека со нејзиното долгогодишно искуство ќе придонесе за решавање на проблемите во новинарската фела.

Самите сме свесни колку ни е деградирана професијата и како можеме да кажеме дека сме „седма сила“, кога станавме оружје за пресметување во рацете на моќниците. Toa e загрижувачки. Неопходни се промени во сите сфери на општеството, меѓутоа кај нас во новинарството се многу повеќе неопходни. Треба да бидеме малку похрабри, посмели, јавно, јасно да ги кажеме сите оние девијации што ќе се случат. Да ги посочиме, да ги разработиме, да видиме како да излеземе од нив - кажа Лазаревска.

На новинарите им порача да ја остават суетата и повеќе да соработуваат и да се солидаризираат, за да го вратат дигнитетот на новинарството.

Лазаревска моментално е без новинарски ангажман, но зад себе има 15 години новинарско искуство во локални медиуми и како дописник на ТВ Телма. Таа доаѓа на местото на Сузана Николиќ, која во два мандати беше координатор на регионалното ЗНМ.