Коледарите го прославија Бадник на Градскиот плоштад во Куманово

Овогодинешниов кум на прославата Драган Трајковски изрази надеж дека традицијата ќе пренесува од генерација на генерација.

„Ова, пред се е голема чест за мене од Здружението „Коледари“. На прославата се позитивни луѓе, насмеана атмосфера, мора да признаеме дека недостасуваат вакви настани, прослави и моменти. Ја користам можноста и денешниот ден и празникот утре да им го честитам на сите, да бидеме живи, здрави, среќни, задоволни и исполнети. На личен план очекувам се да биде како што беше изминатата година- семејно да сме си живи и здрави, сите на број. Останатото само ќе си дојде“, истакна Трајковски.

По осветување на славскиот колач во Соброниот храм „Свети Никола“, беше поделена кумовата погача, а на најсреќниот учесник во поворката му се падна паричка. На плоштадот за посетителите имаше овошје, грејана ракија, топол чај и осветени бадникови гранчиња, набрани од коледарите.

Специјални гости на прославата беа галичката музика - Маевци од Дебар.

Здружението „Коледари“  е активно преку целата година со учество на крводарителски акции, ликовни колонии и други хуманитарни манифестации. Сите активности ги финансираат од сопствени средства.