Кумановци ќе летуваат во Грција и Турција

Две години не сум била никаде, па планирам летово да го посетам Охрид. Добри се и условите и цените според мене. На море досега не сум била, а стандардно секое лето одам на базен или на капење во река Пчиња - вели Наташа Зафировска.

Многу од граѓаните се разочарани од нискиот стандард и не размислуваат за одмор.

Сум била десет пати на Јадранско море и два пати на Егејско море. Сум се шетала во Софија, а во Ќустендил колку пати сум била нема број. Сега сум жена во години и оставам младите да шетаат - се потсетува Невенка Трајковска.

Од туристичките агенции велат дека секоја година желбите на клиентите се различни, но за ова лето најпосакувани дестинации се грчките острови и Турција. Граѓаните резервираат аранжмани за Лефкада и Анталија. Тие обично на одмор заминуваат во шпицот на сезоната од 15 јули до 15 август. Понудите на агенциите за предсезона се поефтини. Во јуни и септември одмор во Грција преку туристичките агенции чини од 100 до 200 евра зависно од сместувањето, превозот, храната.

Има нијанси дали е во втора половина на јули или почеток на август аранжманот. Се може да се договори зависно до потребите на клиентите. Најатрактивни годинава се Турција и Грција, а послаб е интересот за Црна Гора. На прво место е Лефкада, потоа би ги спомнала Крф и Халкидики. Зависно од желбите на клиентот договараме и аранжмани во нашите туристички центри - велат од туристичка агенција “Талија Травел“.

Почнувајќи од први јули па се до крајот на август туристичката агенција “Јоцо Турс“ организира превоз до Охрид, Струга и Дојран. До Охрид имаат тури секој ден, а според искуството од претходните години за Дојран патуваат три пати во неделата, што е сосема доволно за потребите на Кумановци. За турите во странство велат дека најмногу барања летово ќе има за јужниот сосед и за Турција. Динамиката на работата зависи од оформувањето на туристичките групи и од нив зависат патувањата надвор од земјава.