Куманово ќе се задолжи со 3,5 милиони евра

Јас го предложив задолжувањето како излез од нестабилната фискална состојба во која се наоѓа државата. Блок дотациите не стигаат редовно, има дупка во образованието за тековно одржување на училиштата, штрајкови има во целата држава. Таква опасност му се заканува и на  Куманово. За да не се намали оперативното работење на локалната самоуправа во имплементација на проектите, ние по примерите на другите градови кои земаа кредити, се одлучивме за комерцијален кредит наместо за обврзници. Со тоа ќе обезбедиме фискална одржливост во оваа тешка финасиска година- изјави градоначалникот Зоран Дамјановски.

 Одлуката ја подржа мнозинството советници на СДСМ, додека опозиционата ВМРО-ДПМНЕ гласаше воздржано. Тие сметаат дека градоначалникот ја задолжува општината во функција на локалните избори за да добие уште еден мандат од граѓаните.

Ние како советничка група дефинитивно сме за тоа во Куманово да се изгради базен и општинска зграда. Тоа градоначалникот го ветува веќе три години. Досега ништо не направи, туку само го пролонгираше рокот. Сега кога е година пред локални избори, тој ги манипулира граѓаните со тоа што ќе става камен темелник на одреден проект за кои не се знае кога ќе се заври. Поентата е граѓаните да пливаат во базен, а не да се удават во долгови. Затоа ние нема да ја подржиме оваа одлука. Кој е градоначалникот да го задолжува градот за неговите ветувања- смета Бобан Николовски,  координатор на ВМРО-ДПМНЕ.  

Доколку локалната самоуправа ги исполни сите услови предвидени со закон, Владата го одобрува задолжувањето на Општината.