Лазаревска: Куманово ќе биде приоритет за изградба на социјални станови

Куманово треба да биде меѓу првите градови каде што ќе се градат социјални станови, смета директорката на АД за изградба и стопанисување со станбен и деловен простор (АДИССДП) ПО Куманово, Ивана Лазаревска.

 

„Ќе дадам сè од себе Куманово да влезе во новата програма за изградба на социјални станови. Нашиот град е еден од најголемите во државата според бројот на жители, но и според бројот на граѓани кои користат социјални права. Со тоа, Куманово мора да биде приоритет“, вели Лазаревска.

Во тек е подготовката на нов десетгодишен план за изградба на социјални станови, а подружницата на АДИССДП за Североисточниот регион веќе остварува интензивна соработка со локалната самоуправа, Европската банка за обнова и развој, Министерството за транспорт и врски и Министерството за труд и социјална политика.

Лазаревска објаснува дека социјалните згради се градат на локации кои општините ги определуваат за колективно домување во рамки на деталните урбанистички планови.

Во првиот десетгодишен план за изградба на социјални станови, Куманово не беше вклучено. Досега, во рамките на Североисточниот регион, социјални станови беа изградени само во Крива Паланка – зграда со 46 стамбени единици.

Во моментов, се реализираат завршни фази од првата програма за социјални станови. Пред неколку недели, клучеви од нови станови беа доделени во Кочани и Велес, а наскоро се очекува распределба и во Дебар. Изградба се одвива и во скопските општини Бутел и Сарај, како и во Прилеп, а во Штип е во тек постапка за избор на изведувач.

На списокот за изградба во рамки на оваа програма се наоѓаат 32 згради во 25 града, меѓу кои Свети Николе, Гевгелија, Виница, Пробиштип, Гостивар, Битола и Македонски Брод, но Куманово не е меѓу нив.

Покрај социјалните станови, Владата и АДИССДП планираат изградба на три комерцијални станбени згради во Куманово, кои, според Лазаревска, значително ќе влијаат на пазарот на недвижности.

„Познати се три локации во градот, а за две од нив имотно-правните односи се расчистени, што значи дека можеме да започнеме со работа веднаш. Сепак, процесот не е едноставен – потребни се дозволи, проектна документација и расчистување на локациите. Нема да шпекулирам со датуми, но ќе се трудиме изградбата да започне што е можно поскоро“, вели таа.

Лазаревска смета дека и покрај трендот на иселување, новите станови ќе ја зголемат понудата на пазарот и ќе придонесат за намалување на цените, кои последниве години бележат континуиран раст.