„Обичната Ели“ во режија на Лавинија Софрониевска најдобар домашен филм на Фестивалот „ФИЛМАЈ“

Македонскиот краток филм „Обичната Ели“ во режија на Лавинија Софрониевска ја доби наградата за најдобар домашен филм, на конкурсот за „ФИЛМАЈ“- Фестивал на кратoк филм 2022, кој го организира Фото-кино клуб „Козјак” – Куманово.

Одлуката за оваа и за останатите награди ја донесе трочлено стручно жири во состав: Сезер Салихи, сценарист и режисер, Косара Митиќ, сценарист и режисер и Филип Илиевски, член на фото-кино клуб „Козјак“.  

„Новосоздадената „ФИЛМАЈ“ награда за најдобар краток филм се доделува нa „Самa“ во режија на Борна Зидариќ од Хрватска, наградата „Лазар Ѓорѓевиќ“ за најдобра режија оди кај Самир Карахода од Косово за филмот „Изместено“, наградата „Радислав Ристевски“ за најдобра фотографија/кинематографија му припадна на Владимир Самоиловски од Македонија за неговата работа во филмот „Северен Пол“ и наградата „Козјак“ за најдобро сценарио се доделува на Фотис Зампетакис од Грција за филмот „Ангелос на Божиќ“, соопштуваат организаторите.

Целата листа на официјално селектирани филмови, кои ќе се прикажат на фестивалската вечер на 2 јуни 2022 дополнително ќе биде објавена.