Оливер Спасовски нов министер за внатрешни работи

Ова е договорено вчера на лидерската средба меѓу лидерите на ВМРО-ДПМНЕ, СДСМ, ДУИ и ДПА. Спасовски оваа функција ќе ја врши до предвремените избори кои треба да се одржат во април 2016 година. 

Министрите на опозицијата ќе можат да прават кадровски измени , но на секој нов назначен функционер од нивна страна, заменикот ќе биде од ВМРО ДПМНЕ.

Замениците министри ќе имаат право на вето за изборни активности од првиот ден, а ако има конфликт околу одлуката на која се однесува ветото ќе решава ДИК.

Нов министер за труд и социјална политика ќе биде Фросина Ременски. Од заменичките места на опозицијата, Кире Наумов ќе оди во финансии, а заменички места има и за потпретседателот на СДСМ, Александар Кирацовски и за шефот на кабинет на Заев, Љупчо Николовски.

За објавување на „бомби“ медиумите ќе одговараат само ако материјалите се однесуваат на приватноста, но не и за информации од јавен интерес.