Општинскиот штаб донесе вонредни мерки за заштита од пожари

Посебен акцент беше ставен на пожарот на депонијата Краста, кој подолг временски период ја загадува животната средина и го загрозува здравјето на граѓаните, особено на жителите од селата Пчиња и Студена Бара.

Врз основа на податоците од Територијалната противпожарна единица (ТППЕ) Куманово, изготвен е план и се донесени заклучоци по кои ќе се постапува во наредниот период.

„Ја ставивме на располагање целокупната механизација на сите јавни претпријатија за потребите на ЈП „Чистота и зеленило“, со цел да се врши дополнителен нанос на земја на депонијата. Истовремено, ќе ја вклучиме и механизацијата на приватните претпријатија со кои Општината соработува, за целосно гаснење на пожарот, кој е предизвикан од подземните гасови. Дополнително, го задолживме Општинскиот инспекторат и МВР да формираат заеднички тимови, односно позорникарска служба, која ќе биде активна на локациите каде што најчесто избувнуваат пожари. Конкретно, тоа е просторот покрај реката Липковка, каде што постојано се палат пожари, а сторителите мора да бидат откриени. Исто така, ќе биде воспоставен вонреден пункт на Противпожарната единица кај Спомен-костурницата, со цел побрза интервенција на оваа локација“, изјави по состанокот градоначалникот Максим Димитриевски.

Општина Куманово ќе стави на располагање и едно возило на Подружницата на Национални шуми за справување со шумските пожари, бидејќи оваа служба не располага со доволно кадар и техничка опрема.

Градоначалникот ги повика граѓаните да бидат внимателни и да се грижат за сопствениот имот, и да помогнат за да не дојде до предизвикување пожари. Воедно, најави дека од управителите на станбените згради ќе биде побарано редовно да ги одржуваат површините околу зградите, а ќе се организира и дополнителна акција за чистење на дивите депонии.

Посебно внимание ќе биде посветено и на трговските објекти, бидејќи дел од нив картонската амбалажа ја оставаат во контејнерите, со што се создава потенцијална опасност од избувнување пожар.

Покрај депонијата Краста, една од најкритичните точки во моментот е и населбата Перо Чичо, покрај железничката пруга, каде речиси секојдневно горат сува трева и отпад.

Димитриевски ги повика граѓаните да пријавуваат секое сомнително однесување или намерно предизвикување пожар, со цел институциите навремено да интервенираат на терен, како и да покажат граѓанска одговорност и да учествуваат при нивно гаснење.