„Уметност преку волонтирање“ - ораторска вечер во организација на Црвен крст Куманово

Ова е прв ваков настан, а се организира под мотот „Уметноста преку волонтирање“. На јавниот повик се пријавиле 12 лица, волонтери на Црвен крст од различни градови од државата.

„Заврши пријавувањето и сметам дека се доволни 12 оратори кои за 3 до 5 минути ќе ги застапуваат своите ставови на темата. Ангажирана е тричлена комисија на дипломирани филолози, професори по македонски јазик и литература кои најпрвин ќе ги подготвуваат учесниците, а подоцна и ќе ги оценуваат есеите, но и настапот и начинот на презентација. Обезбедивме симболични награди за најдобрите“, истакна Ива Младеновска, секретар на Црвен крст Куманово.

Во повикот беше нагласено дека темата е избрана за волонтерите да размислат за тоа како доброволната работа може да инспирира за да творат и создаваат уметност. Се нагласува прашањето дали волонтерството влијае на создавањето на уметност и во која мера насочува да се посветат на кажаниот збор.

Ораторската вечер ќе се одвива во кубус на вториот кат на Центарот за култура. Влезот е слободен за сите заинтересирани.