Отворена изложба на слики од Детскиот ликовен камп

Кумановската јавност има можност да види вистински уметнички дела со мотиви и пејсажи од прекрасните предели на Пелинце и Етно село, кои ги создале рацете на учениците од основните училишта во градот. Оваа изложба има и хуманитерен карактер, бидејќи по завршувањето делата ќе бидат предадени на Центарот за лица со интелектуална пореченост „Порака наша“.

„На овој ликовен камп учествуваа дваесетина млади ликовни уметници од кои 4-5 се деца со посебни потреби. Општината секогаш ќе дава подршка на вакви акции. Јас како граѓанин ќе се вклучам во оваа аматерска аукција и ќе дадам подршка на овие деца. Колонијата е добар пример за она што значи граѓанска подршка на здруженијата што работата со оваа категорија луѓе“, - рече градоначалникот на Куманово, Зоран Дамјановски.

Детскиот ликовен камп се одржува 5 години, три во меморијалниот центар Пелинце и две во Етно село. Оваа изложба е трета по ред.

„На кампот досега учествувале над 120 ученици од 5 до 9 одделение. Последниве години им се придружија и децата од Порака наша и Дневниот центар Куманово. Изложени се слики од колонијата одржана во 2014 и 2015 година. Нашата соработка продолжува и со Дневниот центар и Порака наша. Оваа година колонијата ќе се одржи од 20 до 24 јуни“, - изјави Нино Величковски, директор на Фондацијата за култура и спорт.

Изложбата ќе биде отворена во наредните десетина дена.