По пауза од 30 години повторно се одржа Пролетен крос на Аџи Тепе - трчаа околу 700 ученици (видео)

На Пролетниот крос на спортскиот аеродором Аџи Тепе во Куманово, денеска учествуваа околу 700 ученици од сите основни и средни училишта во градот.

Најмасовна спортска манифестација ја организираше Општинскиот сојуз на училишен спорт, во рамките на својата редовна годишна програма.

„По 30 години повторно ја организираме манифестацијата. Сега ја обновуваме со план и надеж да прерасне во традиционална, како пролетна манифестација. Во есен ја одржуваме традиционалната, празнична Улична трка за Денот на градот- 11 Ноември“, истакна Марјан Нојковски, претседател на ОСУС Куманово.

Натпревари се одржаа во повеќе категории. Учениците од 3 до 7 одделение се натпреваруваа посебно за секое одделение во машка и женска конкуренција. Заедно беа учениците од 8 и 9 одделение, а во посебна категорија беа сите класови од средношколците, во машка и женска конкуренција. Следствено и истрчаната должина беше прилагодена на возраста на секоја категорија- 200, 300, 400, 600, 800 и 1.200 метри.

„Поделбата е направена поради поголема транспарентност, не може исто да истрчаат деца од трето и од петто одделение, со секоја година детето е посилно, појако, помоќно и побрзо стигнува на целта“, објаснува Нојковски, инаку професор по физичко образование во „Кочо Рацин“.

Од третооделенците најуспешни се Милица Митровска, 1 место, Евгенија Трајковска, 2 место и Лејдина Маличи на трето место. Кај машките натпреварувачи прв на целта стигна Дамјан Спирковски, втор Ајан Ајруни и Давид Ангеловски, трет.

„ Имам 9 години и прв пат трчам, интересно беше да се учествува на кросот. Од моето одделение учествував само јас и освоив прво место. Тренирам фудбал, кошарка и пливање, со спорт се бавам 3 години“, кажа Дамјан Спирковски.

Кај учениците од 4- то оддление најуспешна беше Езона Биљани, па Јована Станојковска и Илина Николиќ на трето место, а нивните врсници Дамјан Анастасовски, Стефан Ивановски и Марко Саздовски стасаа по тој редослед на целта.

Кристина Стојановска е првопласирана кај петооделенците, Ангелина Јеремиќ на второ место и Лиана Трајковска на трето место, а кај нивните врсници победи Сергеј Стефаноски, веднаш зад него е Коста Бојковски и Ермаљ Хасани на трето место.

Кристина Стојановска, ученичка на „Магдалена Антова“ освои прво место во категоријата на 5 одделение во трката на 400 метри.

„Се занимавам со спорт- фудбал, пливање и атлетика. Од моето одделение учествуваа и Каја, Ива, Петар Нешовски и Марио, но само јас успеав да освојам медаља. Препорачувам и на другите ученици да учествуваат на кросот следната година, интересно е“, изјави Кристина.

Клара Спасовска најбрзо истрча 500 метри кај учениците од 6 оддление, по неа Вања Јовановиќ и Лана Станковска, а од машките- Бамир Рушити, Лазар Трајковски и Филип Трендафиловиќ, по тој редослед.

Во категоријата на ученици од 7 одделение најуспешна беше Јана Анастасовска, по неа се пласираа Јована Ангеловска и Сара Стојменовска. Нивните машки врсници Јан Вучковиќ, Ахмет Асановски и Лазар Петровиќ беа најуспешни во нивната категорија.

Учениците од 8 и 9 оддление се натпреваруваа заедно, а први на целта стигнаа Софија Величковска, Миа Голубовска и Клеа Петрушевска, а кај машките Ведран Николовски, Кристијан Јакимовски и Михаил Милановски.

Трасата од 1.200 метри за средношколци најбргу ја поминаа Тијана Јовановиќ, Јулија Стојановска и Нева Петрушевска, во женска категорија, и Шкондран Мухарем, Божидар Трајчевски и Михаил Стошевски во машка.

Дел од наградите ги доделија функционери и раководители на општинската администрација. За се да помине во ред беа присутни полициски службеници, екипи на Брза помош, а на секој учесник беше поделена вода.