Првото бебе родено во Кумановската болница е женско, мајката е од Крива Паланка

Девојчето и мајката се во добра здравствена состојба, а ова е втора рожба во семејството.

Претставници од општинската администрација и раководството на болницата ги посетија мајката и новороденчето.  

„Ѝ посакав на мајката првин таа да заздрави, а потоа девојчето да е живо, здраво, среќно, да си ја сака државата и да си остане овде да придонесува. На младите во Куманово им порачувам навреме да планираат семејства, да не чекаме првородено во 17.10 часот, туку веднаш по полноќ. Семејството е клучно за создавање на едно општество, на градот, на семејството и на традиционалните вредности“, истакна по посетата престедателката на Советот Ивана Ѓорѓиевска.

Во текот на вчерашниот ден имало само уште едно породување, исто така на женско бебе. Во текот на денот персоналот очекува уште едно новороденчето, мајката е на претпородилното одделение.

„Раѓањето на женскиот плод наговестува плодна и бериќетна година. За жал, имаме тренд на намалување на раѓањата и се надевам дека ова е предзнакот за зголемување на бројот на раѓањата. Минатата 2023 година имавме 730 раѓања, за жал бројката на новоредни деца во 2024 е намален на 688 раѓања, што се 40 помалку во однос на претходната година. На моите сограѓани, моите кумановци им посакувам среќна нова година, исполнета со добро здравје, и со повеќе раѓања, повеќе свадби и повеќе дечиња “, истакна директорот д-р Стефан Трајановски.