Резервните официри повикаа на национално единство

На Свечената академија организирана по повод 70 години од ослободувањето и од Првото заседaние на АСНОМ, беa доделени благодарници на борците од НОБ, бранители од 2001 година и на институции кои соработуваат со Организацијата на резервни официри на Македонија.

“Ова го правиме во предвечерието на овој празник, да му дадеме значење и пред се да кажеме пред светот дека Македонија е единствена држава од сите антифашистички земји која во текот на Втората светска војна со сопствени сили се ослободи. Никој не ја ослободи Македонија и затоа таа треба да биде горда. Второ, кога се прогласуваше федерална Македонија во 1944 година, тоа се случи на територијата на Куманово и кумановско. Всушност, беше и меѓународно призната бидејќи на состанокот имаше претставници директно испратени од англискиот премиер Черчил и од американскиот претседател  Рузвелт“ - вели Ѓорѓи Малковски, претседател на Организација на резервни официри на Македонија.

Тој порача дека само народите кои се единствени и обединети имаат иднина и потенцираше дека досега на повеќе од 300 бранители од 2001 година им доделиле благодарници за нивниот придонес за државата.