„Рома труба фест„ по девети пат во Куманово

И годинава на едно место се собраа најдобрите трубачи во регионот, кои пред кумановци го покажаа своето мајсторство на дувачките инструменти.

„Се потрудивме оваа година манифестацијата да биде поразлична и затоа поканивме само професионални оркестри и врвни музичари. Секој оркестар имаше настап од половина час во кој го покажа најдоброто што го умее и знае. Одлучивме фестивалот да има ревијален, а не натпреварувачки карактер за да можеме сите заедно да уживаме и да се дружиме неоптоварени од наградите„ - изјави Самет Салиевски, претседател на КУД „Рушит Шакир„, организатор на „Рома-труба фест„.

Манифестацијата ја отвори, и ѕвезда на вечерта беше пејачката Татијата Стефановска, која ја отпеа ромската химна „Џелем Џелем„, а како специјален гост настапи Ферус Мустафов со својот оркестар. Потоа се редеа настапите на оркестрите „Уска Кан Кантуров„ од Берово, годинешен победник на Гуча, Србија, „Милан Доња Николиќ„ од Врање, „Млади Агушеви„ од Струмица, „Бојан Ристиќ„ од Владички Хан, Србија и „ Агушеви Џамбо„ од Струмица.

 „Рома труба фест„ се одржува со финасиска подршка на Општина Куманово и Министерството за култура. Организаторите најавуваат за догодина, за десет годишниот јубилеј, манифестацијата да трае три дена.