Вината за немање кворум во Советот власта да си ја бара во своите редови, не кај опозицијата, порача координаторот Петковски

„Во моментот на продолжението на седницата останаа само 9 советници од коалицијата на СДСМ, така да седницата не се прекина затоа што ние ја напуштивме, туку затоа тие коишто го прават мнозинството со нивните коалициони партнери, кои ги има многу повеќе од просто мнозинство не беа тука за да се направи кворум. Така да било какво обвинување дека седницата е прекината поради нас не држи вода, вината треба да си ја бараат во своите редови“,  порача Петковски.

Тој додава дека советничката група на која и припаѓа се труди максимално и најодговорно да си ја извршува задачата за која се избрани и речиси секогаш се присутни на седницата, што не е случај со власта, како што се потврди и вчера.

Распоредот на силите во Советот на Општина Куманово се: 16 советници од коалицијата на СДСМ, тројца од ДУИ, 11 членови од коалицијата на ВМРО-ДПМНЕ, двајца од Беса и еден од Алијанса на Албанците.

Петковски вели дека на продолжението на седницата ќе дадат целосна поддршка на точките за социјална помош на лицата со попреченост, како што и досега го правеле тоа кога се работи за интересите на граѓаните, додека за предлогот за нови вработувања во Општина Куманово жестоко ќе се спротивстават.

„На сите им е јасно дека тоа не се вработувања во Општина туку вработувања во партија. Се ближат избори и треба да се вдомат некои партиски војници. Образложението на Општината е дека тоа се прави поради зголемен обем на работа, а сите знаеме дека поради корона повеќе од 2/3 од административците не оди на работа. Сега ќе примаат нови, а некои ќе седат дома и ќе примаат плата“, смета Петковски.

(С.Н.)