Владата и Општината субвенционираат 40.000 денари за приклучок на гас во Куманово

Преку владината програме се предвидени до 25.000 денари за домаќинство и може да се аплицира до 31 октомври, додека Општина Куманово обезбедува по 15.000 денари и повикот трае во текот на целата година.

„Владината програма за ова намена е 10 милиони денари, и ако се поделат по 25 илјади по семејство излегува дека можат да се субвенционираат 400 приклучоци, кои реално треба да ги поделиме со „Струмица-гас“. Со тоа што Куманово има предност пред Струмица, бидејќи веќе имаме инсталирано гасна мрежа во становите на новоизградените згради во последните неколку години. Затоа сопствениците на тие станови можат да дојдат во Јавното претпријатие само со имотен лист и да потпишат договор за приклучок, и веќе наредниот ден ќе бидат вклучени во гасоводната мрежа“, изјави Марко Митровски, директор на ЈП „Куманово-гас“.

На седницата беше предложено овие поволности да бидат повеќе промовирани за да ги искористат што поголем број на граѓани и домаќинства, бидејќи тоа е и во интерес на претпријатието .

„Во прилог ни одат и цените на природен гас на светските берзи, од 130 долари моменталната цена е некаде околу 30-25 долари, што е доста поволно.  Сега е шанса секаде каде има инфраструктура да се приклучат граѓаните. На една од наредните седници можеби би требало да обезбедиме средства за маркетинг, да се промовираат условите. Вкупниот износ од 40 илјади денари навистина треба да се искористи, а и ЈП „Куманово-гас“ ќе застане на цврсти нозе“, изјави Благојче Јаќимовиќ, советник на НСДП.

 Од претпријатието кажаа дека веќе започнале со промоција на поволностите за гасификација во домаќинствата, што резултирало со 6 нови договори за станови, а интерес имало и во уште неколку објекти и приватни куќи, па очекуваат и таму за брзо време да склучат нови договори.