ВМРО-ДПМНЕ повика на масовен протест пред Владата

Според Бране Петрушевски, претседател на општинскиот комитет во Куманово, поради економското и национално истоштување, политички гафови и промашувања, дури и најголемите поддржувачи и симпатизери на СДСМ се чувствувале изневерени и прелажани од оваа власт.

„Денес во Република Македонија, со оваа влада на СДСМ и ДУИ, стравот ја замени демократијата, неморалот го замени моралот, непринципите ги заменија принципите, а неказнивоста за владини функционери станува заштитен знак. Ова е време кога пратеници, уметници и обични граѓани - патриоти се обвинети за тероризам, а се пуштаат на слобода сторители на кривични дела, се промовираат врвни советници за национална безбедност поранешни борци на ОНА како командант Хоџа. Ова е време кога премиерот не пропушта прилика да не убедува во својата чесност, а луѓето од неговото најблиско опкружување безмилосно проневеруваат милиони евра на дневна база. Насочени се кон креирање на колективна хипноза поткрепена со гол популизам и брутални лаги. Нема реформ и работа, има само неспособност и дилетанство“, - изјави Петрушевски на прес-конференција.

Тој апелираше до сите, членови и симпатизери на ВМРО-ДПМНЕ, како и сите обесправени и разочарани граѓани, кои живеат лошо и не им е сеедно каква иднина ја очекува Република Македонија, масовно да излезат на протестниот собир утре на 2. јуни пред Владата во 20 часот и да испратат гласна и јасна порака: Македонија ќе победи!

За сите заинтересирани граѓани се организира бесплатен превоз, со поаѓање од Куманово во 18:00 часот на следниве локации: Спортска сала, Соколана, Пожарна, бул III МУБ (Долче вита), бул. Октомвриска револуција (Жмара), н. Гоце Делчев (Кошеви), н. Зелен Рид (пошта), н. Карпош (Крст), н. Перо Чичо (Коки проширење) и други локации.