Зачленете се во нашиот клуб на читатели и најновите текстови ќе ги добивате на вашата мејл адреса
Епидемијата на голема кашлица во Куманово е завршена, откако не е регистриран нов случај од 19 ноември 2024 година, информираат од Центарот за јавно здравје Куманово - ЦЈЗ Куманово.
Таа беше пријавена на 29 март, минатата година, а регистрирани се вкупно 107 заболени на територијата на Општина Куманово.
Сите случаи се лабораториски потврдени, а најчесто заразени биле децата на предучилишна и училишна возраст.
„Регистрирани се вкупно 49 случаи на деца од предучилишна и училишна возраст, 34 за деца од 0 до 4 години каде инциденцата беше најголема. Во останатите групи според возраста има помал број на инфицирани лица“, истакна д-р епидемиолог Јадранка Стаменковска од ЦЈЗ Куманово.
Со потешка клиничка слика на болничко лекување биле 17 од пријавените пациенти, останатите 90 се лекувале амбулантно и во домашни услови.
Докторка Стаменковска потенцираше дека здравствените тимови од Здравствен дом и ЦЈЗ сериозно се зафатиле со работа, со информирање на сите засегнати. Со надлежните локални институции имале одлична соработка- со раководството на градинката и сите основни и средни училишта биле во постојана комуникација.
Од првиот регистриран случај до завршување на епидемијата регистрирани се 6.691 вакцинирани деца кои не биле или биле делумно вакцинирани. Но, за престанување на епидемијата значајно било и следење на препораките и насоките кои ги давале медицинските лица.
Зачленете се во нашиот клуб на читатели и најновите текстови ќе ги добивате на вашата мејл адреса
