Зачленете се во нашиот клуб на читатели и најновите текстови ќе ги добивате на вашата мејл адреса
Советничката група на ВМРО-ДПМНЕ го обвини претседателот на Советот дека го крши Деловникот за работа, и при водењето на седниците ја злоупотребува својата позиција и ги коментира дискусиите на опозицијата.
Тие сметаат дека однесувањето на првиот советник меѓу еднаквите, на последната седница ја прелеало чашата на некоректно однесување и биле принудени да реагираат остро.
Реагиравме на повредите на Деловникот при водењето на седниците, затоа што претседателот на Советот свесно реплицира, дофрлува и упатува забелешки на дискусиите на советниците од опозицијата кога сака и колку сака, а при тоа не го губи правото на збор, реплика или контра реплика. Кога го изгласавме Деловникот, мислевме дека ќе се внесе демократија, ред и дисциплина во нашето работење, функционирањето на Советот и тоа ќе важи подеднакво за сите. Но, очигледни се привилегиите за советниците на мнозинството, првенствено во давање збор кога имаме советнички прашања - вели Бобан Николовски, координатор на советничката група на ВМРО-ДПМНЕ.
Претседателот на Советот Виктор Цветковски не гледа кршење на Деловникот и смета дека по 1,5 година од функционирањето на Советот првпат отворено е прозван за начинот на кој ги води советничките седници.
Апсолутно не ги прифаќам забелешките затоа што ние работиме согласно одлуките кои што ги имаме донесено, вклучувајќи го и Деловникот. На последната седница расправавме за битни точки, како што беше Буџетот и на таа расправа имаше и политички дискусии за работата на локалната, но и на централната власт. Тоа бараше од моја страна реакции, и нормално опозицијата не беше задоволна. Во недостатотк на аргументи се повикаа на лошо водење на седницата. Тоа е нивна проценка со која јас не се согласувам, но не им го земам за зло, бидејќи по седницата дел од нив дојдоа да се извинат и ми рекоа да не ја сваќам работата лично- вели Цветковски.
Советниците од опозицијата му замераат на претседателот на Советот и поради тоа што не го штител нивниот дигнитет, и не барал од градоначалникот да одговара на писмените прашања на советниците поставени пред повеќе од година и пол.