Зачленете се во нашиот клуб на читатели и најновите текстови ќе ги добивате на вашата мејл адреса
Во Центарот за култура „Трајко Прокопиев“ викендов се одржа 17. Фолклорен фестивал на народни ромски игри и песни „Јекипе-Единство 2018 Куманово“.
Организатор на концертот е Ансамблот на народни ромски игри и песни „Рушит Шакир“ од Куманово, а на присутните се обрати претседателот Самет Салиевски.
„Ова е единствениот ромски фестивал во државата и една од постарите манифестации за припадниците на ромската заедница. Горду сум што упеавме да ја одржиме традицијата и задоволен сум од изборот на годинешниве учесници. Сите дадоа се од себе да се претстават во најдобро светло и посетителите уживаа во програмата“, - изјави Салиевски.
Тој додаде дека локалната самоуправа Куманово е една од ретките во државата која дава целосна подршка за развој и унапредување на културата на етничките заедници, меѓу кои и на ромската култура, што не е случај во другите општини.
Присутните ги поздрави и министерот без ресор Аксел Ахмедовски и градоначалникот на Куманово Максим Димитриевски.
Фестивалот го отвори Мартија Станојковиќ, по што настапија културно-уметничките друштва: „Рушит Шакир“, „Шукарипе“ Кочани, „СРМА“ Куманово, „Тернипе“ Битола, „Јекипе“ Велес, „Тернипе“ Делчево.
Манифестацијата е финансиски помогната од Советот на Општина Куманово и Министерството за култура.