Зачленете се во нашиот клуб на читатели и најновите текстови ќе ги добивате на вашата мејл адреса
Дописниот центар во Куманово, кој се наоѓаше во приземјето на Mузичкото училиште „Панче Пешев“, повеќе не постои.
Локалната самоуправа ги истера новинарите од просториите, за да ги даде на користење на училиштето.
Во објектот повеќе од 40 години работеа новинарите дописници од повеќе телевизии, весници и интернет портали, а таму беше сместена и канцеларијата на Регионалниот центар на Здружението на новинари на Македонија (ЗНМ) за Североисточниот регион.
Дописниот центар е отворен во 80-тите години на минатиот век за потребите на медиумските куќи МТВ, Македонско радио, Нова Македонија, Вечер и Флака.
Со одлука на тогашното Собранието на Општина Куманово и со финансиска помош на стопански субјекти во градот, а како поддршка на локалното новинарство, во просториите на некогашното домаќинско училиште новинарите добиле современ простор за работа.
Плејада на новинари за домашни и странски медиуми поминале низ овој центар. Во оваа заедничка редакцијата работеа и дописниците на Телма, Сител, Канал 5, Вест, Дневник, Утрински Весник и другите медиуми во градот. Од тука се испратени најубавите и најтажните приказни од Куманово и од кумановското секојдневие, а за време на воениот конфликт во 2001 година беше најпосетуваното место од домашните и странски новинари.
Новинарите очекуваа дека локалната власт ќе има повеќе разбирање за нивната работа, па по примерот на нивните предходници во поранешната држава ќе помогне дописништвото да прерасне во современ регионален прес центар, како што е случај во другите градови и во соседните земји, се заради афирмација на граѓанските вредности и подобрување на информирањето.
Но, за жал тоа не се случи, па Куманово остана без уште едно препознатливо место, кое беше белег на едно време и на една професија.