Минималната кошница во август – 48.234 денари, пресмета ССМ

Фото: pxhere.com

Во сумата е пресметана и инфлациска стапка од скоро 17 отсто, но се земени во обзир трошоците за обезбедување на еден ученик за набавка на потребните материјали на почетокот на училишната година што сумата ја зголемува за уште 6.000 денари.

Само за храна и пијалаци во домот се потребни 18.324 денари, сума што е повисока од минималната плата за 324 денари, за домување 12.493 и за хигиена 2.808 денари. Во ставката превоз се пресметани само два месечни билети, работнички, ученички или студентски со вредност од 3.600 ден. Облеката и обувките би чинеле 2.197 ден, доколку секој член од семејството би купил по едно ново парче месечно во сезоната.

Во пресметката за културата е вклучен по еден кино – билет месечно и редовно купување на еден неделен и еден дневен весник. За одржување на здравјето потребни се 768 денари, со само основните трошоци за лекарства (парацетамол, аналгин, кафетин). За хронично болните сумата е значително поголема.  

„Не се вклучени трошоците за рекреација, образование, хотели и ресторани, семејни прослави, не затоа што не се потребни, туку затоа што во кошницата се пресметуваат само неопходните трошоци, па доколку се пресметуваат и овие трошоци вредноста на истата би била многу повисока“, посочуваат од ССМ.

Ставките на потрошувачката кошница се искажани во минимум потребни количини и најниски цени . За исхраната се земени 63 основни производи, кои не ги искажуваат целосно потребите за исхрана, туку ги изразуваат можностите, навиките и традицијата во исхраната.  

О . Пешевска