Несаканите ефекти од вакцините вообичаени, се испитуваат сомнежи за два смртни случаи

Сепак, овие случаи не се потврдени и се прави детална обработка на сите податоци за да се види дали има евентуална поврзаност со примањето на вакцината, истакнаа претставниците на Агенцијата за лекови и медицински средства МАЛМЕД на денешната онлајн средба со новинарите.

Како што посочи раководителката на секторот во МАЛМЕД, Мерјем Хаџихамза се работи за двајца пациенти на 85 и 53-годишна
возраст, вакцинирани со Астра Зенека и Фајзер. Пријавите се поднесени во април и септември годинава.

„Се уште не е докажана поврзаност на смртниот исход со аплицирањето на вакцината. Еден од пациентите имал и многу
коморбидитети. Кога за еден лек, во случајов вакцина, ќе се се пријави некое несакано дејство, тоа не значи дека е последична реакција од примената на вакцината. Има многу параметри што треба да се испитаат
и потребна е комплетна обработка“, истакна Хаџихамза.

Сите несакани реакции и пријави МАЛМЕД ги праќа во Институтот за јавно здравје и во УПСАЛА мониторинг центарот во Шведска.
В.Д. директорот на МАЛМЕД Љирим Шабани истакна дека несаканите реакции од вакцините се минимални и далеку помали од
бенефитите на вакцинацијата кои се многу големи.

„Досега има 133 пријави од лекари, 88 од фармацевти, 10 од други здравствени работници и 15-тина од пациенти. Но, најголем дел од нив се однесуваат на вообичаени несакани ефекти како главоболка, мачнина, болка во екстремитетите, вртоглавица и слично“, рече Шабани.

Од МАЛМЕД истакнаа и дека се врши контрола на увозот и квалитетот на вакцините за што се користат сертификатите од
производителот и од независна лабораторија во рамки на ЕУ мрежата, а истовремено се прават и дополнителни анализи во земјава.
Досега се уништени повеќе серии на вакцини од Фајзер, Синофарм и Астра Зенека, главно заради истекот на рокот, а имало
случај и поради промени предизвикани од отстапувања при „ладниот синџир“.