Europe House Крива Паланка централна точка за поврзување на младите од Североисточниот и Источниот регион

„Изминатата година заедно организиравме многу настани, станавме централен хаб за размена на идеи и искуства за младите од регионот. Се радуваме на многуте локални и меѓународни соработки, како и на секоја нова иницијатива за следен настан“, посочија од Europe House Крива Паланка по повод прославата на првиот роденден.

По тој повод, во општина Крива Паланка престојуваше и амбасадорот на Европската унија во нашата земја, Дејвид Гир, заедно со амбасадорката на Шведска Кристин Форсгрен Бенгтсон и амбасадорот на Бугарија Ангел Ангелов. Евроамбасадорот Гир им врачи благодарници на младите активисти кои дадоа огромен придонес за зближување и разменување на идеи и инспиративни приказни меѓу младите од регионот.

Еврамбасадорот Гир и амбасадорите на Шведска и Бугарија се сретнаа и со градоначалникот на Крива Паланка Сашко Митовски ,при што се разговараше за значајни прашања од повеќе општествени области, меѓу кои животната средина и економскиот развој, соработката со младите, инфраструктурата, културата и други области. Беа посетени и објектите изградени и уредени со поддршка на ЕУ фондовите.

Во рамките на прославата на Europe House Крива Паланка беше организиран и меѓуграничен пријателски кошаркарски натпревар помеѓу КК Крива Паланка и КК Софија.