500x100-1
24. 01. 2020 12:07

Атлетскиот клуб Куманово на Државно првенство во Бугарија

Атлетскиот клуб Куманово на Државно првенство во Бугарија

Атлетичарките од Атлетскиот клуб во Куманово, викендов (25 и 26 јануари) ќе учествуваат на Државно првенство по атлетика во Софија, Бугарија.

Боите на клубот ќе ги бранат атлетичарките: Матеја Ефремовска, Марија Дувлис, Мариа Томиќ, Дијана Вукановиќ, Теа Алексовска, а натпреварите ќе се одвиваат во Асикс арена во Софија.

- Станува збор за многу добро опремена сала со одлични услови, одлична атмосфера. Самото ниво на развојот и квалитет на атлетиката во Бугарија е многу добро, се е на повисоко ниво, натпреварите се одлично организирани, има голема конкуренција, па уште сега се забележува возбудата и адреналиност поради учеството таму. Од нашите поистакнати поединци очекуваме добри резултати. И секако, ќе се потрудиме и оваа година од нашите атлетичари да имаме и репрезентативци, - вели Бранко Колевски, претседателот на Атлетскиот клуб во Куманово.

Тој додава дека Македонија нема таква атлетска сала, па поради тоа тие заминуваат на тренинзи и натпревари во други земји.

- Се трудиме да ги исполниме оние квалификациски стандарди за учество во репрезентацијата, а тие норми подоцна служат за учество на балкански првенства, еворпски или светски. Па затоа и бевме девет дена на подготовка во Белград каде што се трениравме во атлетската сала со одлични услови, - објаснува Колевски.

Атлетичарите ќе продолжат и со тренинзи во Бугарија, неделно по два-три дена , со што нема да ја чекаат сезоната на отворено, туку уште сега ќе влезат во добра форма, за кога ќе почнат натпреварите на отворено да постигнат подобри резултати.

2008 - 2019 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk