Тензиите смирени, Борко Ристовски е дел од репрезентацијата

Недоразбирањата се делумно нерасчистени, а селекторот Звонко Шундовски ќе го поведе на пат за Австрија, затоа што е одлучено ракометниот национален тим во најдобар тим да се обиде да оствари пласман на мундијалот.

Борко Ристовски по само девет минути игра на првиот натпревар против Австрија што се играше во СЦ „Борис Трајковски“ самостојно реши да ја напушти играта, имаше конфликт во играта со Ацо Јоновски и со Велко Марковски, а на селекторот Звонко Шундовски му најави дека нема да брани до крајот на натпреварот, со гестикулации кои ги видоа сите гледачи во салата, но и пошироката македонска јавност преку ТВ екраните.

По ова се појавија шпекулации дека Борко Ристовски ќе биде казнет за својата реакција и дека нема да биде дел од експедицијата за Виена, но сепак, тензиите се смирени и македонската ракометна репрезентација во најсилен состав ќе замине на реваншот со Австрија. Со себе „црвено-жолтите“ ракометари носат багаж од пет гола предност (26-21) кои ќе треба да ги одбранат во вторите 60 минути во Виена.