Зачленете се во нашиот клуб на читатели и најновите текстови ќе ги добивате на вашата мејл адреса
За помош од државата за исплата на минимална плата за месеците април и мај аплицирале 21.542 компании, кажа на денешната прес-конференција директорката на Управата за јавни приходи Сања Лукаревска.
„Согласно донесената уредба за финансиска поддршка на работодавачите погодени од здравствено-економската криза предизвикана од коронавирусот КОВИД-19 заради исплата на платите за месеците април и мај 2020 година, во УЈП заклучно со крајниот рок, 7 мај, преку системот е-даноци поднесени се вкупно 23.861 барање за финансиска поддршка, а се однесуваат за 21.542 компании. Истите барања ќе се обработат и потврдат во рок од три дена и ќе се достават до Генералниот секретаријат на Владата на РСМ од каде ќе се врши исплатата на средствата за месец април 2020 година“, изјави Лукаревска.
Од вкупниот број на поднесени барања од угостителскиот сектор поднесени се 2.377 барања, од туристичките агенции и туроператори 253, од секторот транспорт 2.177, објекти за сместување 258 барања и 16.625 барања од останатите дејности.
За финансиска поддршка за исплата на плати конкурираа и физички лица кои вршат самостојна дејност и според податоците на УЈП, за остварување на ова право поднесени се 5.840 барања.