4000 евра за сопствен бизнис и самовработување

Програмата за самовработување вклучува обука за претприемништво, помош при развивање одржлив бизнис план и регистрирање дејност, неповратни грантови во форма на опрема и материјали и менторство за време на почнување на бизнисот.

„Оваа програма има за цел да го поттикне претприемништвото и да го поддржи креирањето на нови бизниси кои ќе обезбедат одржливи вработувања, не само за самите основачи, туку и за други лица кои ќе се вработат во овие нови фирми, - изјави Милорад Тренчевски, раководител во Агенцијата за вработување Куманово.

Заинтересираните ќе можат да аплицираат во Агенцијата за вработување во Куманово со пополнување на прашалниците.Врз основа на тоа ќе добијат ваучер и еден експерт за изработка на бизнис план. Потоа бизнис планот ќе биде оценуван и доколку биде проценето дека е одржлив ќе добијат грант за отворање мал бизнис.

Со оперативниот план за 2017 година со програмата за самовработување ќе бидат опфатени 1.050 невработени лица од евиденцијата на АВРМ, активни баратели на работа, во 1.000 новоотворени микро компании. Мерката се спроведува 11-та година по ред, а за годинава за неа се предвидени вкупно 283 милиони денари.

Огласот трае до 10 март.