84-годишен маж се обидел да убие жена во хотел во Куманово

Обвинителството донесе Наредба за спроведување истражна постапка против едно лице поради обид да изврши кривично дело – Убиство од член 123 став 2 точка 4 во врска со член 19 од Кривичниот законик.

На 4 декември, во хотел во Куманово, осомничениот 84-годишник, од ниски побуди и со умисла, се обидел да лиши од живот една жена.

Утрото го искористил моментот кога гостин од хотелот ја отворил вратата, па влегол во објектот и се упатил кон собата каде што биле оштетената и нејзиниот неподвижен сопруг.

„Кога го забележала, жената станала и тргнала кон вратата за да го спречи да влезе, но во тој момент осомничениот извадил нож и ја удрил во пределот на главата. Во моментот кога ножот му паднал од рака, оштетената успеала да се оддалечи и со висок тон започнала да бара помош. Нејзиниот син, кој бил во соседната соба, веднаш реагирал и го спречил напаѓачот“, стои во соопштението.

По предлог на јавниот обвинител, судија на претходна постапка од Основниот суд Куманово му одреди мерка притвор на осомничениот.