Исправна и со добар квалитет е минералната водата од чешмите во Проевце

„Најмалку 4 пати годишно се проверува квалитетот на водата, иако по потреба вршиме и вонредни тестирања. Резултатите на Центарот за јавно здравје покажуваат дека водата  е со добар квалитет, слободна за пиење и користење“, одговори докторка Блерта Шахини Азизи.

Голем број жители на Куманово за пиење ја користат токму водата од „Вруќа вода“, се полнат балончиња и по неколку гајби шишиња, количина за еднонеделно користење на четиричлено семејство.

„Со години ја користиме, водата е со одличен квалитет, дома не пиеме ниту од водовод, ниту пак купуваме. Ама полнењето е хорор приказна, неуредено, валкано, плочките се извадени, рабниците на скалите назабени, можеш да се сопнеш. Е паркинг има, навистина мал, ама ги задоволува потребите. Ретко се случува да има гужва, некогаш во попладневните часови“, изјави Дејан Б. од Куманово.

Термалната вода во Проевце е лековита за нервниот систем и системот за варење, полесни форми на шеќерната болест, за уринарниот тракт, за бубрезите, за, гинеколошки проблеми, за егземи и разните дерматолошки состојби. Поради својството за обновување на ткивото, таа се смета и дека подмладува. Поради присуство на флуор се препорачува и за стоматолошки проблеми.

Според некои податоци Кумановска бања по хемиски состав е идентична со Врњачка и Буковичка Бања во Србија, со Бањата Виши во Франција, со изворите Вилдунген и Маријанске Лазне во Република Чешка. Според некои анализи, оваа бања е дури и подобра од нив, односно ги нема недостатоците кои тие ги имаат.