Четириесетина барања за обештетување од поплави

Најголем дел од граѓаните бараат надомест на штета за поплавените домови и помошни простории, а мал дел бараат отштета за поплавено земјоделско земјиште.

„Најмногу барања се доставени од жителите на улица “Никола Тесла“ и населба Средорек, а мал број има од населбите Вера Которка и Бедиње. Ќе треба комисија да излезе на терен и да направи проценка на штети, да ја види фактичката состојба. Збирниот извештај за штетите ќе помине на седница на Совет, и ќе го испратиме до Владата на Република Македонија“ - вели Цоки Ристовски, претседател на општинска комисија за проценка на штети од елементарни непогоди.

Поплавите се случија пред десетина дена, кога реките Којнарка, Кумановка и Липковка се излејаа од своите корита и предизвикаа штети во куќи и на имоти на граѓаните.