Четврта титула по ред за женскиот кошаркарски тим на СОУ „Ѓорче Петров“ од Крива Паланка

Првенството се одржа во спортската сала „Бранители 2001“, а домаќин беше токму СОУ „Ѓорче Петров“ во соработка со Општинскиот сојуз на училишен спорт на Крива Паланка.

На турнирот учествуваа четири најдобри екипи од земјата: СОУ „Ѓорче Петров“ – Крива Паланка, Државното училиште Спортска академија – Кавадарци, СОУ „Славчо Стојменски“ – Штип и СОУ „Методи Митевски-Брицо“ – Скопје.

Екипата од Крива Паланка уште еднаш ја потврди својата доминација во женската кошаркарска конкуренција, продолжувајќи ја серијата на успеси.

– Чест е за првпат да се биде домаќин на едно вакво елитно натпреварување, на најдобрите четири средношколски тимови и драго ми е што како училиште сме повторно први, што продолжува традицијата на златни одличја и во новата генерација девојки кои допрва ќе имаат свој збор во оваа сфера, рече директорката на СОУ „Ѓорче Петров“, Елена Ѓорѓиевска.

На свечената церемонија зборуваше и претседателот на Федерацијата на училишни спортови на Македонија, Александар Туфекчиевски, кој ја пофали одличната организација на првенството и изрази благодарност до домаќинот – училиштето и општинскиот сојуз, предводен од Билјана Јовановска.

– Задоволство е да се видат сите учесници на едно место, со една цел – спортска фер игра, надигрување и дружба, истакна Туфекчиевски.

Присутен беше и градоначалникот на Крива Паланка, Сашко Митовски, кој го искажа својот ентузијазам и поддршка за младите спортисти.

– Моите искрени честитки ги упатувам до сите млади спортисти кои повторно нѐ радуваат со своите резултати, оправдувајќи ја довербата од професорите, вложувањата во нивното усовршување и надградба како спортисти. Но овие млади спортисти докажуваат дека сите вложувања, поддршка и стимул со стипендирање и поддршка на спортските работници и спортот, носат резултати, а според ова што го гледам убеден сум дека и во иднина овие млади спортисти ќе не радуваат и ќе носат уште поголеми успеси и за СОУ Ѓорче Петров и за градот и во следните години, изјави Митовски.

Второпласирани беа кошаркарките од Спортската академија од Кавадарци, а третото место го освои СОУ „Славчо Стојменски“ од Штип.

СОУ „Ѓорче Петров“ веќе четврта година по ред е државен првак во женска кошарка. Минатата учебна година тие освоија и двојна круна – беа шампиони и во кошарка и во баскет. Во 2022 година се закитија со титулата балкански вицешампиони во баскет, во 2023 освоија европска бронза, а во 2024 ја претставуваа Македонија на Светската гимназијада во Бахреин.

Никола Митовски