Деца пеат песна за Максим Димитриевски на хуманитарен концерт, СДСМ обвини за политичка злоупотреба (видео)

„Во основното училиште „Кочо Рацин“ во Куманово, каде што работи сопругата на Максим Димитриевски, како и претседателката на Советот на Куманово, Ивана Георгиевска, исто така од ЗНАМ, била организирана т.н. „хуманитарна акција“ од страна на Советот на родители. Наместо вистинска хуманост, на настанот биле злоупотребени децата и принудени да ја пеат песната од изборната кампања на Димитриевски“, велат од СДСМ.

Од партијата додаваат дека ова претставува класична злоупотреба на деца за политичка промоција, спротивна на законите и грубо кршење на нивните права, поради што бараат итна институционална реакција од сите надлежни органи – Државниот просветен инспекторат, Министерството за образование и наука и Комисијата за заштита на правата на детето.

„Член 12, став 4 од Законот за заштита на децата, строго забранува злоупотреба на децата за политичко организирање и дејствување. Бараме утврдување одговорност и соодветни санкции за сите инволвирани. Децата не смеат да бидат алатка за политички цели“, велат од партијата, која сподели видео од настанот.