Дедо Мраз на мотор пристигна во Куманово

Манифестацијата „Дедо Мраз на мотор“ започна да се организира во 2008 година, со што оваа година се одржува по 12-ти пат, во организација на Мото клуб „Мечки“ од Куманово.

„Целта и организацијата ни беше да поттикнеме нешто добро кај луѓето. Најпрво, започнавме со возење на моторите низ градот и донирање на подароци во Дневен Центар за лица со интелектуална попреченост, а тоа се` уште го правиме традиционално. Малку нашиот репертоар го проширивме оваа година со учество на плоштадот и на средните училишта, ама главната цел никогаш не ја забораваме, а тоа ни се штитениците на Центарот со посебни потреби, тие ни се оставени за на крај. Сакам да изразам голема благодарност до сите, бидејќи претходната година немавме толку голема поддршка од други организации, оваа година се гледа дека она што ние сакаме да го правиме дека и другите сакаат да помогнат, иако ние сме моторџии луѓето гледаат нешто позитивно во нас за целиот град и за децата коишто се штитеници, на лицата со посебни потреби, “-вели Виктор Михајловски од Мото клубот „Мечки“.

Родителите заедно со дечињата во раце, чекаа на ред за да се сликаат со Дедо Мраз на мотор и велат дека вакви организации се радост за сите луѓе, не само за децата.

„Ова е убава манифестација, ние сите заедно како семејство дојдовме овде, овде е и маж ми и децата. Едноставно мислам дека сите треба да дадеме поддршка на вакви настани, за да прераснат во традиција,“- вели една од мајките.

Моторџиите на Куманово, оваа година најпрво се собраа кај Градскиот базен во 11 часот, а потоа откако продефилираа низ градот пристигнаа на Градскиот плоштад заедно со претставници и од други градови на нашата земја, но и со учесници од Србија и Бугарија.