Ден на жалост во Куманово, поради трагедијата во Романовце

Советниците едногласно одлучија утре 25 февруари да биде Ден на жалост во Општина Куманово. При тоа се откажуваат сите забавни, културни и спортски манифестации, а  угостителските објекти се обврзани да емитуваат сериозна музика. Знамињата во Општината ќе бидат поставени на половина копје.

- Во вакви тешки моменти тешко можат да се најдат зборови на утеха. Човечки е да тагуваме и да бидеме емотивни, но и да ја споделиме болката со семејствата и да се обидеме да им помогнеме во овие исклучително тешки моменти. Кога ќе изгубите некој близок член на семејството загубата е ненадомеслива, а болката огромна и навистина треба време повторно да продолжите со својот живот и да ја гледате иднината на останатите членови на семејството. Семејствата Алими и Сакипи се во исклучително тешка состојба, но со тоа што сите ние како граѓани на Општина Куманово, независно од етничката, верската, политичката и било која друга определба, независно од тоа каде живееме и каде работиме, сочувствуваме со нив и се обидуваме да ја споделиме нивната тага и болка. Со зборови на утеха да им дадеме малку надеж во овие тешки денови, да им покажеме дека не се сами во оваа трагедија и во овие тешки моменти, - изјави претседателката на Советот, Атина Мургашанска.

Таа најави дека Советот во рамките на своите надлежности и можности ќе помогне на семејствата во матерјална и финансиска помош.

Поддршка и сочувство на семејствата и побрзо закрепнување на повредените изразија и претставниците на сите советнички групи, како и градоначалникот Максим Димитриевски.

- Куманово ќе прогласи Ден на жалост, бидејќи тоа е најмалку што можеме да направиме ние како сограѓани. Во овие тешки моменти сите сме сплотени и сите сме заедно со семејствата, им стоиме на располагање да помогнеме во секој момент институционално но и вонинституционално, за колку толку да им ја ублажиме болката на членовите на семејствата и на сите кумановци, кои ги потресе овој немил настан. Ние со двете семејства ќе бидеме засекогаш тука како вистински пријатели и комшии да се најдеме едни со други во најтешките моменти. Да се држиме заедно и да бидеме секогаш сложни и упорни да истраеме на сите предизвици коишто се пред нас, - рече во своето обраќање Димитриевски.

Советниците беа едногласни дека истражните органи треба што побрзо да ги откријат причините за несреќата, а државата да преземе мерки за поголем контрола на производителите и продавачите на плински боци.