Дијабетичарите се едуцираа за кардиоваскуларни заболувања

Тие беа советувани како да се грижат за своето здравје, да внимааат на исхраната, да се движат, да не пушат, кои се здравствените ризици и компликации. Предавачот интернистот Ладислава Крстиќ-Милосављевиќ рече дека кај дијабетичарите често се јавуваат срцеви и мозочни удари.

Ризици има многу. Денеска темата ни е кардиоваскуларни заболувања, од коронарна артериска болест, мозочен удар , зголемен ризик за хипертензија, за периферни васкуларни болести, значи голем е дијапазонот. Денеска ќе се задржиме на најчестите и ќе гледаме од практичен аспект да објасниме за пациентите - рече докторката.

Предавањето го организира Здружението на дијабетичари од Куманово по повод вчерашниот ден 29 септември-Ден на срцето.

За наши членови ќе има мерење на шеќер , да го проверат шеќерот пред ручек. Успеавме на сите пациенти кои се на инсулин да обезбедиме по едно апаратче и 50 ленти на два месеци. Тоа е наша заслуга, со молби до министерство го решивме тој проблем - рече Драган Гачевиќ, претседател на Здружение на дијабетичари од Куманово.

Присутните кажаа дека се придржуваат до советите од лекарите, примаат терапија и редовно одат на предавањата за дијабетичари.

Ова е предавање за васкуларниот систем кој ми е оштетен и убаво е да слушнам. Дијабетичар сум 20 години. Дисциплинирана сум во однос на исхрана, примање терапија и во однос на сите предавања кои ќе ми бидат корисни за моето здравје. Примам инсулин редовно, наутро, напладне и навечер - изјави Виолета Паневска, дијабетичар.

Гачевиќ вели дека имаат регистрирано над 6000 дијабетичари во Куманово, од кои 2000 примаат инсулин, а тип 1 имаат 40 деца. Тој додава дека на секој еден откриен има плус уште еден заболен од дијабетес кој не е откриен. За таа цел организираат секоја година мерења на шеќер по селата, при што се покажало дека од вкупно опфатените граѓани 6 отсто се заболени од дијабетес.