Домот за стари лица „Зафир Сајто“ ќе аплицира за средства од Владата за реконструкција на дел од просториите

ЈП „Куманово-план“ изработува проектна документација за реконструкција и санирање на дел од Домот за стари лица „Зафир Сајто“ во Куманово, со која ќе се аплицира за добивање на средства од Владата за реализација на инфраструктурни проекти, обезбедени од унгарскиот кредит.

Со проектот е предвидено да се реновираат три реони на домот, на кои досега не било интервенирано.

„Планот е да се реконструираат и реновираат уште три реони од институцијата, оние кои не стасавме со сопствени средства да ги обновиме. За среќа, преостанува помала површина, кујната и трпезарискиот дел е завршен и опремен со нова опрема во 2018 година, саниран и направен е нов кров, а рековме дека и половина од домот е веќе реновиран. На надворешниот дел ќе се работи на терасите од каде протекува вода и се појавува влага во просториите“, објаснува Дејан Стојановски, директор на „Зафир Сајто“.

Според раководството на „Куманово план“ на објектот ќе се задржи постојната состојба на архитектура со максимално зачувување на оригиналните облици и форми, како и изгледот на самата фасада.

„Планираме целосно отстранување на малтер од ѕидните површини со нивна обнова, комплетна замена на сите подови, поставка на хидроизолација, замена на стара електро- инсталација. По завршувањето на овој проект Домот за стари лица ќе биде со сосема нов заслужен и достоиствен лик“, посочи директорката на ЈП „Куманово-план“ Анета Шандева Доневска.