Зачленете се во нашиот клуб на читатели и најновите текстови ќе ги добивате на вашата мејл адреса
Здружението на граѓани „ЛАГ АБЕР 2015“ од Старо Нагоричане, со финансиска поддршка на Амбасадата на Франција, ќе реализира проект за подобрување на визибилноста на локалитетот Кокино и негово прилагодување за потребите на туристите.
Проектот предвидува изработка на патна сигнализација, инфо-табли, изработка на веб сајт и мапирање на најзначајните точки на локалитетот.
„Како што е познато, многу малку е направено за Кокино во тој поглед, а и досегашните вложувања немаа одржливост. Денес, Кокино се наоѓа во незавидна состојба, пред се` поради уништената патна сигнализација која го отежнува доаѓањето на туристите, како и згаснувањето на официјалниот сајт на локалитетот, оштетените и уништени информативни табли и сл. Поради тоа локалитетот не може да понуди организирано движење на посетителите и нивна анимација без ангажирање на локален водич“, - информира претседателот на „ЛАГ АБЕР 2015“, Дејан Ѓорѓиевски.
Увидувајќи ги овие недостатоци „ЛАГ АБЕР 2015“, заедно со НУ Музеј Куманово, во предлог-проект нуди решенија за овие проблеми. Предлогот е одобрен и веќе активно се работи на негова реализација, а според програмата, интервенциите ќе завршат до март 2020 година.
„ЛАГ АБЕР 2015“ е избрана како една од организациите кои добија субвенција од вториот повик за партнерство со македонското граѓанско општество.